Ішкі нарықты қорғау үшін Қазақстан үшінші елдерден келетін құрылыс материалдарының импортын шектеді
Қазақстанда үшінші елдерден келетін цемент, гипсокартон, табақ шыны, тастан жасалған бұйымдар мен құрғақ құрылыс қоспаларының импортына шектеулер енгізілді. Бұл шара ішкі нарықтағы бағаларға теріс әсерін тигізген жоқ әрі отандық өндірістің өсуін қамтамасыз етті. Бұл туралы Үкімет отырысында өнеркәсіп және құрылыс министрі Ерсайын Нағаспаев мәлімдеді, деп хабарлайды ҚР Үкіметінің телеграм арнасы.
Ішкі нарықты қамтамасыз ету үшін минералды тыңайтқыштардың экспортына лицензиялау талабы енгізілді, бұл оны фермерлерге белгіленген бағамен жеткізуге кепілдік берді. Металл сынықтары айналымы саласында қара металлургияны дамыту, болаттың жаңа маркаларын игеру, сондай-ақ автомобиль, машина жасау және құрылыс салалары үшін өнім өндірісін кеңейту үшін реттеу тетіктерін жетілдіру жұмыстары жалғасуда.
«Министрлік өндірісті толық жүктеу және отандық өнім үшін тұрақты өткізу нарығын қалыптастыру бағытында жүйелі жұмыс жүргізуде. Осы мақсатта Қазақстандық тауар өндірушілердің тізілімі іске қосылды. Ірі компаниялар отандық өндірушілермен ұзақ мерзімді сатып алу тетіктерін кеңейтіп, ел ішінде өндірілетін өнім үлесін арттыру және шағын, орта бизнесті дамытуға бағытталған бағдарламаларды жүзеге асыруда», — деді ведомство басшысы.
