Алматы облысы агросекторда өсім қарқынын сақтап келеді: рекордтық өнім және инвестициялар
Өңір агроөнеркәсіп кешенінде тұрақты өсім көрсетіп келеді. 2025 жылдың 9 айында ауыл шаруашылығы өнімдерінің жалпы көлемі 534,8 млрд теңгені құрап, физикалық көлем индексі 100,8% болды, деп хабарлайды ҚР Ауыл шаруашылығы министрлігі
Министрліктің ақпаратына сәйкес, фермерлер 346,2 мың тонна астық жинады, орташа өнімділік 26,9 ц/га, бұл өткен жылмен салыстырғанда шамамен 15%-ға жоғары. Күтілетін жүгері өнімі – 338 мың тоннадан асады, бұл облыс үшін жаңа рекорд. Іле және Еңбекшіқазақ аудандарындағы бірқатар шаруашылықтарда өнімділік 80 ц/га деңгейіне жетті.
«Шаруалар 183,2 мың тонна картоп және 408,4 мың тонна көкөніс пен бақша дақылдарын жинады. Көкөністердің орташа өнімділігі гектарына 263 центнерді құрады. Бұл өңір мен Алматы қаласының қажеттілігін толық қамтамасыз етіп, артық өнімді Жетісу және Жамбыл облыстарына экспорттауға мүмкіндік берді.
Қазір 24,4 мың гектар ауыл шаруашылығы жерінде тамшылатып және жаңбырлатып суару әдістері қолданылуда. Жыл соңына дейін бұл көрсеткішті 31,6 мың гектарға дейін ұлғайту жоспарланған», — делінген хабарламада.
Агросекторда жалпы сомасы 33,5 млрд теңгені құрайтын 17 инвестициялық жоба жүзеге асырылуда. Оның ішінде 8 нысан — сүт-тауарлы фермалар, қайта өңдеу зауыттары және жылыжай кешендері пайдалануға берілді.
Негізгі назар жоғары қосылған құны бар ет және сүт өнімдерін өндіруге аударылған. 9 айда 192,8 мың тонна ет өндірілді, бұл 2024 жылмен салыстырғанда 4%-ға көп. Мал басы: ірі қара — 621,5 мың бас, ұсақ мал — 2,68 млн бас, құс — 9,29 млн бас.
Өңірде 56 сүт фермасы және 57 бордақылау алаңы жұмыс істейді, жаңа мал шаруашылығы нысандарының құрылысы жалғасып жатыр.
Сондай-ақ облыста жалпы ауданы 79,2 гектарды құрайтын 48 жылыжай кешені жұмыс істейді. Олар жыл сайын 13,8 мың тонна көкөніс өндіреді. Негізгі дақылдар — қызанақ (8,2 мың тонна) және қияр (4,4 мың тонна).
«Облыстың ауыл шаруашылығы сенімді түрде алға жылжып келеді. Бұған шаруаларға мемлекеттік қолдау шаралары, агротехнологиялардың сақталуы, ғылым мен инвестициялар ықпал етуде», — деді Алматы облысы ауыл шаруашылығы басқармасының басшысы Ғалым Тоқпейісов.
