2025 жылдың басынан бері елдің таулы аймақтарында тауда адасып, өздігінен төмен түсе алмаған 200-ден астам адам құтқарылды. Бұл туралы ҚР ТЖМ баспасөз қызметі хабарлады.
Тау — көркем, бірақ олар құрмет пен сақтықты қажет етеді. Демалыс қауіпсіз және жақсы өтуі үшін ТЖМ таудағы қауіпсіздік ережелерін қатаң сақтаудың маңыздылығын еске салады.
Саяхатшының басты мақсаты – тәуекелдерді барынша азайту. Ең алдымен маршрутты мұқият жоспарлап, дайындалу қажет, қар көшкіні мен сел жүру қаупі бар аумақтардың картасымен, ауа райы болжамымен танысу керек. Тауға шығу туралы және қайтып оралатын болжамды уақытты 112 қызметіне хабарлау қажет.
Жорыққа дайындық
Тауға аттанбас бұрын маршрутты мұқият зерттеңіз, оның ұзындығын, биіктік айырмашылығын, күрделі учаскелерін, демалуға қолайлы орындарын анықтаңыз. Қайда және қашан баратыныңызды, қашан оралуды жоспарлап отырғаныңызды жақындарыңызға міндетті түрде хабарлаңыз. Ауа райы болжамын тексеріңіз, тауда ауа райы күрт өзгеруі мүмкін: тіпті жаз мезгілінде дауыл, найзағай, қар жаууы ықтимал. Жергілікті жермен алдын ала танысыңыз, өзіңізбен бірге карта, компас, GPS немесе навигатор алыңыз. Маршрут биікке көтерілу мен қиын өткелдерді қамтыса, мұндай жорыққа алдын ала физикалық тұрғыдан жақсы дайындалып барған жөн.
Жабдықтар
Тауға шығу кезінде өзіңізбен бірге алып жүруге қажетті жабдықтар тізімі: треккингке арналған тау аяқ киімі. «Қабаттап киіну» қағидасы бойынша киім: термокиім, жылу ұстайтын ортаңғы қабат, желден және жаңбырдан қорғайтын сыртқы күртеше. Су мен тамақ қоры – есептелген мөлшерден көбірек алған жөн. Алғашқы көмек қобдишасы: таңғыштар, антисептик құралдар, ауырсынуды басатын дәрілер, лейкопластырь, аллергияға қарсы дәрі-дәрмектер. Бағыт-бағдар құралдары: карта, компас, навигатор, толық қуатталған телефон және пауэрбанк. Күннен қорғану құралдары: күннен қорғайтын көзілдірік, крем, бас киім. Фонарь және қосалқы батареялар. ТЖ кезінде белгі беру құралдары: ысқырық немесе дабыл айнасы.
Жолдағы жүріс-тұрыс ережелері
Топпен бірге жүріңіз, артта қалмаңыз және алға шықпаңыз. Қуатыңызды үнемдеңіз, жүктемені теңдей бөліп алыңыз. Ауа райын қадағалаңыз, найзағайдың алғашқы белгілері байқалса, төменге түскен дұрыс. Әсіресе таныс емес жерде жолдан шықпаңыз, оңай адасып қалуыңыз мүмкін.
Альпинистердің алтын ережесі
«Тауға шыққанда ұсақ-түйек нәрсе болмайды». Тіпті кішкентай қате — киімнің дұрыс таңдалмауы, судың жетіспеуі немесе жолдағы абайсыздық — қауіпті жағдайларға әкелуі мүмкін. Егер біреу жарақат алса, алғашқы көмек көрсетіп, зардап шеккенді жылы ұстаңыз да, құтқарушыларға хабарлаңыз.
