Kazakh Tourism компаниясының басқарма төрағасы Ержан Еркінбаев Kids go free бағдарламасының биылғы талаптарын түсіндірді, деп хабарлайды ҚазАқпарат тілшісі.
«Kazakh Tourism компаниясы Kids go free бағдарламасының әкімшісі және операторы болады. Бұл – балалардың ұшу шығынын субсидиялау тетігі. Бұл бағдарлама топ-10 дестинацияда отбасылық демалысты ұйымдастыру көлемін арттыруға бағытталған. Бағдарлама туристік операторлар арқылы іске асады. Яғни, 2-14 жас аралығындағы баласы бар отбасы қазақстандық курорттарға туристік операторлар арқылы билет сатып алған болса, балалардың билет құны кешіріледі», – деді компания басшысы орталық коммуникациялар қызметінде өткен брифингіде.
Kazakh Tourism басшысы мұндай субсидия 2-3 жолдамаға төленбейтінін ескертті. Сондай-ақ, билет құны тек туристік операторлар арқылы демалысқа барған отбасыларға ұсынылмақ.
«Мұндағы жалғыз талап – ұшып келген жерде отбасы 4 түн, 5 күннен кем болмауы керек. Осы арқылы біз Қазақстандағы отбасылық демалысты қолдаймыз. Біздің есебіміз бойынша осының арқасында отбасының жолдама алуға кететін бюджеті 20-30 пайыз үнемделеді», – деді Ержан Еркінбаев.
