Сыбайлас жемқорлыққа қарсы іс-қимыл агенттігі мен ҚР СИМ басшылығының кездесуі өтті
Тараптардың бастамасы бойынша Сыбайлас жемқорлыққа қарсы іс-қимыл агенттігі мен Сауда және интеграция министрлігі басшылығының кездесуі өтті. Негізгі күн тәртібі Министрлік жетекшілік ететін салаларда сыбайлас жемқорлықтың алдын алу бағыты жөніндегі өзара іс-қимыл мәселелеріне бағытталған, деп хабарлайды Jana-kezen.kz министрліктің баспасөз қызметіне сілтеме жасап.
Бейне-конференция байланысы бойынша іс-шараға Сыбайлас жемқорлыққа қарсы қызметтің аумақтық бөлімшелері, СИМ, оның ведомстволары мен ведомствоға бағынысты ұйымдары да қатысты.
Агенттік Төрағасының орынбасары Дмитрий Малахов Сауда және интеграция министрлігі құрылған сәттен бастап (2019 жылғы шілде айы) бірде-бір сыбайлас жемқорлық құқық бұзушылық анықталмағанын атап өтті.«Сонымен бірге босаңсудың қажеті жоқ. Министрлік жетекшілік ететін салалардағы сыбайлас жемқорлық тәуекелдеріне жоғары жасырындылық дәрежесі тән. Осыған байланысты, оң көрсеткіштің тұрақтылығын қамтамасыз ету үшін бірқатар алдын алу шараларын іске асыру қажет», – деп айтып өтті спикер.
Атап айтқанда, сыбайлас жемқорлық тәуекелдерінің арасында тарифтік квоталарды, квотаішілік мөлшерлемелерді реттеу, тарифтік жеңілдіктер беру, әлеуметтік маңызы бар азық-түлік өнімдеріне бөлшек сауда бағаларының шекті мәндерін белгілеу мәселелері көрсетіледі. Тұтынушылардың құқықтарын қорғау, сондай-ақ техникалық реттеу және метрология жөніндегі заңнаманың сақталуын мемлекеттік бақылау функциясын жүзеге асыру кезінде азаматтар, кәсіпкерлер және ведомство қызметкерлері арасында «тікелей байланысу» сақталады.
Министрліктің жауапты хатшысы Жәнібек Нөпіров бизнес-үдерістерді автоматтандыру мен оңтайландыруға назар аудара отырып, сыбайлас жемқорлыққа қарсы іс-қимыл бойынша қабылданып жатқан шаралар туралы хабардар етті.
Атап айтқанда, барлық көрсетілетін мемлекеттік қызметтер электрондық форматқа ауыстырылды. Тұтынушылардың құқықтарын қорғау комитеті шағым беруді жеңілдету мақсатында, Telegram мессенджерінде чат-бот және топ құрды. Ағымдағы жылдың шілде айынан бастап сәйкестікті бағалау саласындағы электрондық аккредиттеу жүйесі іске қосылды.
Қазіргі уақытта бірқатар жобалар іске асырылуда. «Экспорттаушыларға арналған бірыңғай цифрлық терезе – export.gov.kz» пайдалануға ыңғайлы диджитал-платформаны құруға және экспортты ілгерілету саласында мемлекеттік қолдау шараларын көрсету бойынша бизнес-процестердің реинжинирингін жүргізуге мүмкіндік береді.
Тағы бір жоба – «Тұтынушылардың құқықтарын қорғау жөніндегі цифрлық платформа». Ол тұтынушылардың өтініштерін орталықтандырып жинауды, өңдеуді және басқаруды қамтамасыз етеді.
Болашақта Ұлттық аккредиттеу орталығы «е-аккредиттеуге» көшуді жоспарлап отыр. Бұл өтінім беру, шарттар жасасу, сәйкестік сертификаттарын беретін кәсіпорындарға аккредиттеу аттестатын берудің цифрлық қолтаңба пайдалана отырып, тек электрондық түрде жүргізілетінін білдіреді.
Министрліктің қосалқы қызметтер мен ведомствоға бағынысты органдарды орталықтандыруды көздеп отырғандығы хабарланады.
