Соңғы уақытта ақпараттық кеңістікте сиыр еті бағасының өсуі мен ішкі нарықта ет тапшылығы болуы мүмкін деген алаңдаушылық байқалып отыр. Алайда, 2025 жылдың 7 айындағы нақты деректер саланың тұрақтылығы мен оң динамикасын көрсетеді, деп мәлімдейді ҚР АШМ баспасөз қызметі
Министрліктің ақпаратына сәйкес, шілде айының соңындағы жағдай бойынша ірі қара мал басы 8,7 миллион басты құрады, оның ішінде сиыр саны – 4,5 миллион (+3,1%). Бұзау саны 2,7 миллионға дейін өсті (+17,9%), бұл өндіріс көлемін одан әрі арттыруға негіз бола алады.
«Қаңтар–шілде айларында елде 608,8 мың тонна ет өндірілді (+1,8%), оның ішінде 205,7 мың тоннасы сиыр еті. Бұл ішкі нарықта ұсыныстың жеткілікті екенін және саланың тұрақты дамып жатқанын дәлелдейді.
Қазақстандық сиыр етіне сыртқы нарықтардағы сұраныс өсіп келеді. Қаңтар–маусым айларында экспорт көлемі 16,1 мың тоннаны құрады (2,4 есеге өскен). Негізгі бағыттар — Өзбекстан, Тәжікстан, Қырғызстан, Қытай және БАӘ. Бұл отандық өнімнің жоғары сапасы мен бәсекеге қабілеттілігін растайды», – делінген хабарламада.
Қазіргі уақытта бордақылау алаңдарының жүктемесі 35–40%-ды құрайды. Оны арттыру мақсатында 2025 жылдың 1 тамызынан бастап 5% мөлшерлемемен 12 ай мерзімге жеңілдетілген несие беру бағдарламасы іске қосылды. Бұл мақсатқа 50 млрд теңге бөлінді. Бағдарлама жас мал сатып алу, жем-шөп, ЖЖМ және жабдық алуды қаржыландыруды көздейді және бордақылау алаңдарының жүктемесін 60%-ға және одан жоғары деңгейге жеткізуге мүмкіндік береді.
«Сиыр еті бағасының өсуіне қарамастан, қазіргі баға өндірушілер үшін рентабельді болып отыр. Мемлекеттік қолдау ұсыныстың қысқаруына емес, керісінше, оның өсуіне ықпал етіп, ішкі нарықтың сұранысын толықтай қанағаттандыруда.
Осылайша, ет саласындағы жағдай бақылауда және жаңа мүмкіндіктерге жол ашады», – деп қорытындылады министрлікте.
