Қазақстан Республикасының Цифрлық даму, инновациялар және аэроғарыш өнеркәсібі министрлігі (ҚР ЦДИАӨМ) және Біріккен Ұлттар Ұйымының Даму бағдарламасы (БҰҰДБ) цифрландыру, мемлекеттік қызметтер көрсету және инновациялар салаларындағы ынтымақтастық жөніндегі ниет туралы өтінішке қол қойды, деп хабарлайды Jana-kezen.kz.
«БҰҰДБ-ға Қазақстанның цифрлық саласын дамытуға қосқан үлесі үшін алғыс айтамын. Бірлескен күш-жігерімізбен электрондық мемлекеттік қызметтер көрсету сапасын арттыруға, қазақстандықтардың барлық жерде Интернетке қол жеткізуіне және оның нәтижесінде мемлекеттік сектордың цифрлық трансформациясын жеделдетуге қол жеткіземіз. Атқарылған істердің нәтижесі қазірдің өзінде байқалуда. Алайда, алда әлі көп жұмыстар бар», – деп түсіндірді Қазақстан Республикасының Цифрлық даму, инновациялар және аэроғарыш өнеркәсібі министрі Бағдат Мусин.
БҰҰДБ цифрландыру саласындағы жетекші халықаралық сарапшыларды тартуға қолдау көрсетеді, сондай-ақ Реинжиниринг және цифрлық трансформация орталығына 200 мың АҚШ доллары мөлшерінде гранттық қаржыландыру бөледі.
Ынтымақтастық дамудың ұлттық басымдықтарына және орнықты даму саласындағы 2030 жылға дейінгі кезеңге арналған жаһандық күн тәртібіне сәйкес Қазақстандағы цифрлық трансформацияны жеделдетеді деп болжауда. Атап айтқанда, тараптар азаматтар мен бизнес өкілдерінің цифрлық мемлекеттік қызметтерге қол жеткізуін жақсарту, әлеуметтік қорғау саласында цифрлық шешімдерді енгізу, шалғай ауылдарда сапалы интернетпен қамтамасыз етуге инвесторлар үшін бизнес-пакеттер әзірлеу, сондай-ақ мемлекеттік сектордың цифрлық трансформациясын жеделдету мақсатында орталық мемлекеттік органдардың IT-департаменттері қызметкерлерін оқыту бойынша жұмыс істейтін болады.
«Цифрландыру басқару, әлеуметтік қорғау және жасыл экономикамен қатар БҰҰДБ ұсынатын ден қою бағдарламасының негізгі саласы болып табылады. Аталған салалардағы бастамаларды іске асыру дағдарыстан кейінгі кезеңде әлеуметтік-экономикалық қалпына келтіруге ықпал етіп қана қоймай, елдерге тұрақты даму саласындағы мақсаттарға қол жеткізу жолына оралуға көмектеседі», – деп атап өтті БҰҰДБ-ның Қазақстандағы тұрақты өкілі Якуп Бериш.
Covid-19 пандемиясы басталғаннан бері Қазақстанда БҰҰДБ қолдауымен орталық және жергілікті атқарушы органдардың 1000 мемлекеттік қызметшісі қашықтықтан жұмыс режимі жағдайында қызметінің тиімділігін арттыру мақсатында негізгі цифрлық және коммуникациялық дағдыларды дамыту бойынша оқытудан өтті.
