Кеңес жұмысына вице-министр Берік Камалиев, ҚР ИИДМ Автомобиль жолдары комитетінің төрағасы Сайранбек Бармақов, «ҚазАвтоЖол «ҰК» АҚ Басқарма Төрағасы Ұлан Әліпов және «Computer Vision Technologies» ЖШС Басқарма Төрағасы Зейнұр Майтеков қатысты.
Қазір ұзындығы 5,8 мың шақырым болатын жолдың 18 учаскесінде бақылау аркаларын орнату бойынша құрылыс-монтаждау жұмыстары аяқталып, 10 учаске тестілік пайдалануға берілді. «Шымкент-Өзбекстан шекарасы», «Орал- РФ шекарасы (Саратов)», «Орал – РФ шекарасы (Самара)» және Ақтөбе – РФ шекарасы (Орынбор)», «Щучинск-Петропавл», «Шымкент-Қызылорда», «Шымкент-Тараз», «Тараз-Қайнар», «Қапшағай-Талдықорған», «Қостанай-Тройцк» учаскелерінде 41 бағдарламалық-аппараттық кешен орнатылды. Енді барлық бағдарламалық-аппараттық кешенді орнатуды аяқтап, қалған 8 учаскені тестілік пайдалануға беру жоспарда.
Жалпы ұзындығы 5,8 мың шақырымды қамтитын I кезең аясында ақылы учаскелерді 2021 жылғы 30 наурызда іске қосу жоспарланып отыр.
Айта кету керек, 2021 жылы инвестициялық келісімшарт аясында ұзындығы 800 шақырым болатын 5 учаскеде құрылыс-монтаж жұмыстары жоспарланған. Олар: «Петропавл-РФ шекарасы (Қорған)», «Щучинск – Зеренді», «Таскескен – Бақты», «Жетібай – Жаңаөзен» және «Ақтөбе – Қарабұтақ» учаскелері.
Естеріңізге сала кетейік, 2025 жылға қарай Қазақстандағы ақылы жолдардың ұзындығы 11 мың шақырымға жетеді. Одан түскен қаражат жолдарды жөндеуге, күтіп-ұстауға, ақы алу жүйелеріне қызмет көрсетуге және инвесторға төлеуге жұмсалады.
