2023 жылдың 2 айының қорытындысы бойынша Қазақстан Республикасы Ұлттық қорының (ҚР ҰҚ) көлемі өткен жылдың сәйкес кезеңімен салыстырғанда 1 160,8 млрд теңгеге яғни 4,1%-ке өсті, деп хабарлайды Ұлттық экономика министрлігінің баспасөз қызметі.
Негізінен, қаражаттың ұлғаюы мұнай секторы ұйымдарынан түсетін салық түсімдерінің өсуімен, сондай-ақ республикалық бюджетке трансферттердің төмендеуімен байланысты болды.
Осылайша, салық түсімдерінің көлемі 1 197,1 млрд. теңгені құрады, бұл 2022 жылдың сәйкес кезеңімен салыстырғанда 147,3 млрд. теңгеге немесе 14%-ке артық. Қаражаттың ұлғаюы пайдалы қазбаларды өндіруге салынатын салықтан түсетін түсімдердің 273,8 млрд. теңгеге (2 еседен астам) өсуі есебінен қамтамасыз етілді.
Келісімшарттар бойынша өнімді бөлу бойынша ҚР үлесі есебінен түсімдер 87,8 млрд. теңгеге дейін төмендеді, бұл өткен жылдың сәйкес кезеңімен салыстырғанда 130,2 млрд.теңгеге немесе 60%-ке аз.
Жоғарыда айтылғандай, 2023 жылғы қаңтар-ақпанда Қазақстан Республикасының Ұлттық қорынан республикалық бюджетке трансферттер төмендеген. Осылайша, 2023 жылдың алғашқы екі айында кепілдендірілген трансферт көлемі 621 млрд. теңгені құрады, бұл өткен жылдың сәйкес кезеңімен салыстырғанда 364 млрд.теңгеге яғни 37%-ке аз.
Алайда нысаналы трансферт 7 есеге ұлғайып, 360,6 млрд. теңгені құрады.
Осылайша, 1 тоқсанның қорытындысы бойынша Қазақстан Республикасы Ұлттық қорының қаражаты 29 392 млрд. теңгені құрады және жыл басынан бері қаражат көлемі 256 млрд.теңгеге өсті.
Қазақстан Республикасы Ұлттық қорының қаражатының өсуі мұнай бағасының төмендеуі, сондай-ақ ұлттық валютаның нығаюы кезеңінде өтті. Осыған қарамастан, теңге бағамының әлсіреуі және ОПЕК-тің мұнай өндіру көлемінің төмендеуіне қатысты шешімі ағымдағы жылы Қазақстан Республикасының Ұлттық қорына түсімдердің одан әрі ұлғаюына әсер етуі мүмкін.
