Зерттеу: өңірлік жоғары оқу орындары түлектерді жұмысқа орналастыруда көш бастап тұр

2023 жылғы білім беру бағдарламалары рейтингінің қорытындысы бойынша ЖОО түлектерінің жұмысқа орналасуының орташа пайызы 2023 жылы 3,3% – ға өсіп, 82,8% -ды құрады

ҚР Ғылым және жоғары білім министрлігі «Атамекен» ҚР Ұлттық Кәсіпкерлер палатасымен бірлесіп, алтыншы жыл қазақстандық жоғары және жоғары оқу орнынан кейінгі білім беру мекемелерінің білім беру бағдарламаларына тәуелсіз бағалау жүргізді.

2023 жылы жоғары оқу орындарын бағалау 19 критерий бойынша жүргізілді. Олардың ішінде негізгілері – түлектерді жұмысқа орналастыру, сапа көрсеткіштері, жетістіктер, ББ мазмұнын бағалау, ЖЖОКБҰ жалпы көрсеткіштері.

Мәселен, өткен жылдың рейтингінде «жұмысқа орналастыру» критерийінде мемлекеттік жоғары оқу орындары арасында бірінші орынды 94%-бен Д.Серікбаева атындағы Шығыс Қазақстан техникалық университеті және Ы.Алтынсарин атындағы Арқалық педагогикалық институты бөлісті. Екінші орында 89%-бен А. Байтұрсынов атындағы Қостанай өңірлік университеті тұр. Ал, М.Қозыбаев атындағы Солтүстік Қазақстан университеті мен М.Өтемісов Батыс Қазақстан университеті 88%-бен көшбасшылар үштігін толықтырып отыр.

Ұлттық университеттерге келетін болсақ, мұнда жалпы пайызы 89% болатын Қазақ ұлттық қыздар педагогикалық университеті көш бастап тұр. Одан кейін Қ.И.Сәтбаев атындағы Қазақ ұлттық техникалық зерттеу университеті және Л. Н. Гумилев атындағы Еуразия ұлттық университеті 88% – бен орналасқан.

Сондай-ақ, «Бастауыш оқытудың педагогикасы мен әдістемесі» және «Орман ресурстары және орман шаруашылығы» бағыттары бойынша рейтингте бірінші орынды Семей қаласының Шәкәрім атындағы университеті иеленді. Л.Н.Гумилев атындағы Еуразия ұлттық университеті «Шет тілі: екі шет тілі» мамандығы бойынша түлектерді жұмысқа орналастыруда көш бастап тұр.

2023 жылдың қорытындысы бойынша «Радиотехника, электроника және телекоммуникация» мамандандыруында Қ.И.Сәтбаев атындағы Қазақ ұлттық техникалық зерттеу университетінің түлектері сұранысқа ие болды.

Рудный индустриалды институты «Құрылыс» мамандарын даярлау бағытында Ш. Уәлиханов атындағы Көкшетау университеті мен Л.Н. Гумилев атындағы Еуразия ұлттық университетін басып озып, көш бастап тұр. А.Сағынов атындағы Қарағанды техникалық университетінің «Автоматтандыру және басқару» мамандығының түлектері – 2023 жылы ең көп жұмыспен қамтылғандардың қатарында.

ҚР ҒЖБМ ғылым және жоғары білім саласындағы сапаны қамтамасыз ету Комитетінің төрағасы Әділет Тойбаев талапкерлер мен олардың ата аналарына:

«Талапкерлер мен олардың ата-аналарының назарын тағы да аударамыз, болашақ мамандықты таңдауға мұқият қарау керек. Таңдау кезінде мамандыққа деген сұраныс сияқты аспектілерді ескеру қажет. Еңбек нарығындағы перспективалы мамандықтар туралы неғұрлым ертерек және саналы түрде хабардар болсаңыз, соғұрлым кәсіби таңдау жасайсыз», – деген үндеумен жүгінді.

Рейтингтің толық нәтижелерімен «Атамекен» ҰКП сайтында танысуға болады https://atameken.kz/ru/university_ratings